Ny kontrakt

Skal levere to konstruksjonsfartøy til Volstad Maritime

Kleven har inngått kontrakt om levering av to subsea konstruksjonsfartøy til Ålesund-reiarlaget Volstad Maritime. Dei to fartøya skal leverast frå Myklebust Verft i Gursken i desember 2014 og andre kvartal 2015.

 
Kleven overtek desse to prosjekta, som får byggnr. 376 og 377, frå Bergen Group Fosen. Fartøya er av typen ST 259 CD frå designselskapet Skipsteknisk i Ålesund, og er søsterskip til 'Grand Canyon' som vart levert frå Bergen Group til Volstad i 2012.

- Det er to store og avanserte fartøy for subsea vedlikehald og konstruksjonsarbeid som no skal leverast frå Myklebust Verft. Vi bygde trålaren 'Volstad' til Volstad-familien tilbake i 1988, og vi ser fram til å samarbeide igjen om desse nye prosjekta, seier konsernsjef i Kleven, Ståle Rasmussen. 

Fartøya vert 127 meter lange og med ei breidde på 25 meter. Dei vil ha innreiing for 104 personar.